ടൌണില് നടക്കുന്ന പുസ്തകമേളയിലേക്ക് അവനെ കൂട്ടിക്കൊണ്ടുപോയത് കൂട്ടുകാരില് ഒരു പുസ്തകപ്പുഴുവായിരുന്നു. താല്പര്യമില്ലെന്നും മൈ ഹോബി ഈസ് വാച്ചിങ്ങ് ടി.വി, ഓണ്ലി വാച്ചിങ്ങ് ടി.വി എന്നൊക്കെ പലവട്ടം പറഞ്ഞു നോക്കിയിട്ടും പുസ്തകപ്പുഴു അവനെ ബലമായി പുസ്തകമേളയിലേക്ക് കൂട്ടിക്കൊണ്ടു പോകുകയായിരുന്നു.
മേളയില് എത്തിയപ്പോള് പുസ്തകപ്പുഴു പുസ്തകങ്ങളില് പലതും അരിച്ചെടുക്കാന് തുടങ്ങി. അവനാകട്ടെ ഇടക്കിടെ വാച്ചില് സമയം നോക്കിക്കൊണ്ട് പുസ്തകപ്പുഴുവിനോട് അക്ഷമയോടെ പറഞ്ഞു.
-കലക്കനൊരു പ്രോഗ്രാമുണ്ട് രാത്രി ടി.വിയില്. ചിരിച്ചു ചിരിച്ച് മനുഷ്യാനൊരു വകയാകും. വീട്ടിലെത്താന് ലേറ്റായാല് അതു കാണാനാവില്ല. അതുകൊണ്ട് എന്താ വാങ്ങാനുള്ളതെന്നു വെച്ചാല് വാങ്ങിയിട്ട് വേഗം വാ.
പറയുന്നത് പുസ്തകപ്പുഴു കേട്ടതായി ഭാവിക്കുന്നില്ലെന്നു കണ്ട് കൂടെ വന്നു പോയല്ലോ, ഒഴിഞ്ഞു മാറിക്കളയാമായിരുന്നു എന്ന ചിന്തയോടെ അവന് മുന്നില് കണ്ട പുസ്തകങ്ങളില് ചിലത് വെറുതെ അലക്ഷ്യമായി മറിച്ചു നോക്കി.
ഒടുവില് പുസ്തകങ്ങള്ക്ക് ഇടയില് ഒരിടത്തു കണ്ട താറാവുകളെ വളര്ത്തുന്നതിനെ പറ്റിയുള്ള പുസ്തകം അവന് കൈയിലെടുത്തു തുറന്നു നോക്കി. തുറന്നു നോക്കിയ പേജില് തന്നെ താറാവിന്റെ മുട്ടകളുടെ ഫോട്ടോയുണ്ടായിരുന്നു. അവന് പിന്നെയും അതിലുള്ള പല ചിത്രങ്ങളും നോക്കിയതിനു ശേഷം ആ പുസ്തകം തിരികെ തന്നെ വെച്ചു.
അവരിരുവരും ഒടുവില് അവിടെ നിന്നും പുറത്തേക്കിറങ്ങി. ഒരു കെട്ട് പുസ്തകങ്ങളുമായി മുന്നില് നടക്കുന്ന പുസ്തകപ്പുഴുവിന്റെ പിന്നാലെ പാന്റിസിന്റെ കീശയില് രണ്ടുകൈയും ഇട്ടുകൊണ്ട് നടക്കവെ അവന് ചോദിച്ചു.
-ഇവിടെ അടുത്തെവിടെയെങ്കിലും താറാമുട്ട കിട്ടുമോ? എത്ര കാലായീന്നോ ഒരു താറാമുട്ട കഴിച്ചിട്ട്.
-0-
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ